+24 °С
Ямғыр
МӘҘӘНИӘТ
6 Ғинуар 2022, 08:20
"Йыл тамашаһы"
Шәһиттең үҫмер сағы “Йыл киноһы” йәки "Йыл тамашаһы" номинацияһында, һис шикһеҙ, Күгәрсен район телевидениеһының Роман Алферовтың повесы буйынса Хоҙайбирҙин ауылы менән берлектә төшөргән “Шәһиттең үҫмер сағы” фильмын билдәләү урынлы булыр. Күренекле дәүләт эшмәкәре Шәһит Әхмәт улы Хоҙайбирҙиндың 125 йыллығы арналған был фильмдың режиссеры - Фәймә Аҡъюлова. Унда Хоҙайбирҙин ауылы халҡы ҡатнашты. Төп ролдәрҙә Айнур Байғазин, Рамаҙан Хоҙайбирҙин, Рамаҙан Һөйөндөков (Шәһит), Алина Ғәҙелева (Йәмилә), Зәйнулла Байғазин (Әхмәт), Рәмил Әмиров (Абдулла), Миңзәлә Күсәрбаева (Әминә), Ренат Хоҙайғолов (Әбүбәкир), Гөлфиә Ихсанова (Фәхерниса), Илгиз Ғәҙелев (Хажиәхмәт Рәмиев), Әлиә Исхаҡова (Артыҡбикә), Динара Әминева (Мәрзиә), Азалия Ғайсина, Зилиә Һөйөндөкова (Зәбиҙә) ҡатнашһа, күмәк сәхнәгә мәктәп уҡыусылары, ауыл халҡы йәлеп ителде.
"Йыл тамашаһы"
- Яҡташыбыҙ, башҡорт халҡының арҙаҡлы уландарының береһе Шәһит Хоҙайбирҙиндың тыуыуына 125 йыл тулыу уңайынан фильм төшөрөргә Хоҙайбирҙин халҡы үҙе тәҡдим итте. Ваҡиғалар теҙмәһе ҡышҡыһын да барғас, ҡар иреп бөтмәҫ борон башланды фильм төшөрөү. Бөтә ауыл менән бергә боронғо кейем-һалымдар, аяҡ кейемдәре, көнкүреш кәрәк-яраҡтары, боронғо бәләкәй сана, саңғылар, сәкәндәр эҙләп таптыҡ. Мәҙәниәт бүлегенә, музей хеҙмәткәрҙәренә ярҙам иткәндәре өсөн ҙур рәхмәт. Телевидение хеҙмәткәрҙәрен иһә һәр береһен айырып телгә алып үтеү ҙә артыҡ булмаҫ. Эште ойоштороуҙа Ринат Әлимғужин ярҙам итһә, фильмдың йөкмәткеһен, тәрәнлеген ябай камера менән генә лә тота алған оператор Әсхәт Әлимғолов, видеомонтажер Рөстәм Алламоратов, автор тексын еренә еткереп уҡыған “Мораҙым” гәзите хәбәрсеһе Азамат Ғәҙелшиндарҙы ысын мәғәнәһендә үҙ эшенең оҫталары тиергә була, - ти Фәймә Миңлейәр ҡыҙы.
"Йыл тамашаһы"
