Зәңгәр сатыр ҡорған ине кисә...

Зәңгәр сатыр ҡорған ине кисә-

Бөгөн - тимгел һорғолт быяла.

...Юҡһынамы икән хәтфә сағын

Йәйрәп кенә ятҡан буҙ ялан?

Һағынамы икән зөмрәт сағын-

Һағыш баҫҡан һары ҡайынды.

Салт көмбәҙҙә йондоҙ тоноҡланған

- Илай микән Зөһрә-ай ҡыҙы?..

Күк торналар осто хушлашмайса,

(Ҡайтыр микән ҡабат яҙҙарын?)

...Буш кәмәлә бейей, эй, моңһоҙ ел,

Үкһеҙ ҡалған йылға ярҙары...

Һағынамы таллыҡ һандуғасын-

Һиллек баҫҡан урман ҡосағын...

...Бер нуры бар шыҡһыҙ миҙгелдең дә-

Ипкен бөркә балан усағы...