Селтәр-ҡашмау эшләп тағайыҡ

Күгәрсен районының “Ағинәйҙәр ҡоро” йәмәғәт ойошмаһы ла VI Бөтә донъя фольклориадаһына әҙерлек эштәрен башланы. Ҡор етәксеһе Әминә Әҙелғужина әйтеүенсә, ағинәйҙәр иң тәүҙә был мәртәбәле сараға милли күлдәк тегеп, башҡорт ҡатын-ҡыҙҙарының биҙәүес әйберҙәрен эшләп тағыуҙы маҡсат итеп алды. Ошо юҫыҡта ауылдарҙа селтәр, түшелдерек, ҡашмау эшләү буйынса оҫталыҡ дәрестәре ойошторолдо. Бөгөн иһә район мәҙәниәт һарайында күренекле йәмәғәт эшмәкәре, педагог, башҡорт сәсәндәр мәктәбе етәксеһе, милли биҙәүес әйберҙәр эшләү оҫтаһы Асия Ғәйнуллина менән осрашыу үтә. Унда райондың төрлө ауылдарынан ағинәйҙәр ҡоро ағзалары ла ҡатнашасаҡ.Сара тураһында тулыраҡ мәғлүмәт гәзит биттәрендә булыр.