Һоғондороу йолаһы

Был үҙенсәлекле йола Урал аръяғында, беҙҙең районда ла таралған, шулай уҡ ҡайһы бер төрки халыҡтарҙа, мәҫәлән, ҡаҙаҡтарҙа бар. Аш ашап, бер талай ҡунаҡтар туйып алғас, хужа мотлаҡ “Һоғондороу” йолаһын башҡара: иң һимеҙ ит киҫәген һайлап ала ла ҡунаҡҡа һоғондора. Беҙҙең яҡтарҙа һалма менән ҡушып, майлы ит киҫәген тоҙлоҡҡа манып тороп һоғондоралар. Аҙағынан һыуһынға тоҙлоҡло һурпаға ҡорот иҙеп бирәләр. Күгәрсендә һоғондороу йолаһы менән бынан бер нисә йыл элек Үрге Бикҡужа ауылында осраштым. Ҡунаҡтарҙы ихласлап һыйлаған апай ҙа беҙҙең Урал аръяғыныҡы - Баймаҡтан булып сыҡты. Тик беҙҙең яҡтарға ғына хас булғанса табаҡҡа мул итеп туралмайса һалынған һимеҙ ит, тултырма, һалма бешергәйне ул. Ҡунаҡтарҙы һоғондороп һыйлауҙары –үҙе бер тамаша.