Тынмаһын гармун моңо!

“Гармун ҡайтһын ауылға” тигән кисәлә берсә һағышлы, берсә дәртле гармун моңдары тамашасыларҙы йәшлек иленә әйҙәне.

Үҙҙәренең йыр-моңдары менән тамашасыларҙы әсир иткән ижади төркөм төрлө ауыл таланттарын берләштергән: концертты оҫта итеп алып барыусы, ҡыҙыҡ көләмәстәр һөйләп көлдөрөүсе Миңһылыу Ибраһимова Ҡасҡын клубы мөдире булып эшләй; оҫта итеп баянда уйнаусы Фәнил Бикбулатов, ретро йырҙар йырлаған Фәрҙәнә Мөхәмәтйәнова менән Зиннур Чиляковтар – санъяптыҡылар; матур тауышлы йырсы, юморға бай Ғәлимә Дәүләтбирҙина – Аралбай клубы мөдире; районда уҙған гармунсылар бәйгеһендә күп тапҡырҙар ҡатнашып, призлы урындар яулаған Наилә Әхмәтгәрәева, Зилә Йәнбулатова, Резеда Хисамова, Рәйлә Садиҡова – Йомағужанан.

- Төрлө тормош мәшәҡәттәре баштан ашһа ла, беҙҙе йыр-моңға булған һөйөү берләштерҙе. Машина яллайбыҙ ҙа, тәғәйен ауылға барып, концерт ҡуйып ҡайтабыҙ.

Яңауыл тамашасылары беҙгә бик оҡшаны, йыр-моңдарыбыҙҙы ихлас ҡабул иттеләр, алҡыштарға күмделәр. Насип булһа, тағын килербеҙ әле, - тип яңауылдарға рәхмәт белдерҙе Йомағужанан килгән Әсмә апай Ибраһимова.

Яңауыл клубы мөдире.