Әҙип әҫәре менән тере

Район китапханаһында күренекле йәмәғәт эшмәкәре, билдәле яҙыусы- педагог, Салауат Юлаев ордены кавалеры Мәрйәм Бураҡаеваның Башҡортостандың халыҡ яҙыусыһы, төрки ҡатын-ҡыҙҙары араһындағы тәүге трилогия авторы, яҡташыбыҙ Зәйнәб Абдулла ҡыҙы Биишеваның тормошона, уның ижад юлына бағышланған “Оло Эйек ҡыҙы” тип аталған китабының презентацияһы булып үтте. Унда район хакимиәте башлығы Ғайса Янбаев, уның социаль мәсьәләләр буйынса урынбаҫары Эльвера Фәйрушина, “Киске Өфө” гәзитенең баш мөхәррире, республика “Ағинәйҙәр ҡоро” йәмәғәт ойошмаһы етәксеһе Гөлфиә Гәрәй ҡыҙы Янбаева, шулай уҡ китапхана мөдирҙәре, ойошма етәкселәре, журналистар, яҙыусының ижадын хөрмәт иткән яҡташтары ҡатнашты.

Район башҡорттары ҡоролтайы башҡарма комитеты рәйесе Гөлфиә Искәндәрова сараның төп маҡсатын билдәләп сығыш яһағас, һүҙ район хакимиәте башлығына тапшырылды. Ул үҙ сиратында авторҙы 75 йәшлек юбилейы менән тәбрикләп, иҫтәлекле бүләк тапшырҙы, күренекле яҡташыбыҙ Зәйнәб Биишеваның ижадына етәксе күҙлегенән сығып баһа бирҙе, уның әҫәрҙәренең үлемһеҙ булыуы, бөгөнгө быуында илһөйәрлек, телһөйәрлек рухын тәрбиәләүҙә ҙур әһәмиәткә эйә булыуын билдәләне.

- Зәйнәб апай Биишева аҙмы-күпме булһа ла, аралашып йәшәргә тура килде. Ул ваҡытта беҙ әле йәштәр инек. Ҡайсаҡ уның менән һөйләшеү түгел, эргәһенә барырға ла баҙнат итмәй торғайныҡ. Ә ул шундай ябай кеше булды. Һәр ваҡыт беҙгә шылтыратып хәлдәрҙе, яңылыҡтарҙы белешеп торор ине. Ә беҙ, йәштәр, нисек инде ундай бөйөк кеше миңә улай шылтырата икән тип, ҡурҡып, хатта уңайһыҙланып, оялып китә торғайныҡ. Ул милләтен яратты, халҡын ихтирам итте, йәштәрҙе күтәрҙе, беҙҙе үҙ ҡурсауына алып, кәңәштәрен биреп торҙо. Ул биргән кәңәштәрҙе, әйткәндәй, бөгөн дә тотороға тырышабыҙ,- тине ул.

“Оло Эйек ҡыҙын” әҙәбиәт һөйөүселәргә генә түгел, уҡыусыларға, уҡытыусыларға ла тәҡдим итергә була. Уны уҡығас, яҙыусы башҡорт халҡы өсөн кем ине, ябай тормошта кем булды, уның тормошо һәм шәхесе бөгөнгө башҡортҡа, тотош башҡорт йәмғиәтенә ниндәй һабаҡ бирә, уның күңел донъяһы кимәле ниндәйерәк ине, уны нимә көйөндөрҙө, нимә һөйөндөрҙө – ошо һорауҙарға яуаптар алып, яҙыусыны бөтөнләй икенсе күҙлектән асырға була. Китапта шулай уҡ халыҡ яҙыусыһының уй-кисерештәре, һыҙланыуҙары, көйөп – яныуҙары, шатлыҡ-ҡыуаныстары менән һуғарылған хаттары ла баҫылған.

Яҙыусы тураһында хәтирәләре менән оҙаҡ йылдар мәғариф өлкәһендә эшләгән ветеран-уҡытыусы Зәкиә Йәрмөхмәтова ла бүлеште.

Әҙибәләр менән осрашыу Теләүембәт ауыл клубында ла булды. Унда Мәрйәм Бураҡаева менән Гөлфиә Янбаева урындағы халыҡ менән һөйләште, гәзиткә яҙылыу ойошторҙо.