Башҡортостанда Мостай Кәримдең «Беҙҙең өйҙөң йәме» китабы буйынса Рәсәй фильмындағы төп ролгә малай эҙләйҙәр

«Мотор фильм студия» кинокомпанияһы (Мәскәү) Рәсәй Федерацияһы Мәҙәниәт министрлығы булышлығында Мостай Кәримдең «Беҙҙең өйҙөң йәме» китабы буйынса балалар өсөн фильм төшөрөү буйынса әҙерлек эштәрен дауам итә.

Фильмдың режиссеры — Александр Галибин, сценарий авторы – яҡташыбыҙ Айҙар Аҡманов. Кинотаҫма июнь айында Башҡортостан ауылдарының береһендә төшөрөлә.

Өлкәндәр ролен башҡарыусыларға кастингтар уҙҙы ла инде. Йәмиль роленә башҡорт телен белгән 6-8 йәшлек малай кәрәк.

Кастинг бер нисә этапта уҙғарыла:

Беренсе этап: [email protected] электрон адресына ебәрелгән фотоһүрәттәр һәм үҙаллы төшөрөлгән видео буйынса һайлап алыу. Хатта анкета мәғлүмәттәре: исем-шәриф, тыуған йыл, буй, әгәр булһа — түңәрәк-студия, ата-әсәнең телефоны күрһәтелергә тейеш. Шулай уҡ 3-4 актуаль портрет фотоһы һәм бер буй-һын төшөрөлгән фотоһүрәт кәрәк (фото 500 кб тиклем). Хат менән бергә видеовизитка ебәреү зарур, унда исемеңде, йәшеңде һәм үҙең хаҡында бер нисә һүҙ әйтергә кәрәк, ләкин 1 минуттан ашмаҫҡа тейеш. Видеоны яҡты бинала телефонға ла яҙҙырырға мөмкин. Бер хат итеп ебәрергә. Хаттың темаһы: «Йәмил роленә — исем-шәриф, тыуған йыл».

Икенсе этап: һайлап алынған кандидатураларҙы 2018 йылдың май аҙағында яңғыҙ видеоһынауҙарға саҡырыу.

Өсөнсө этапта партнерҙар менән һынауҙар уҙғарыла.