Беҙҙең Зәйнәп апа

Редакцияға бик күп хаттар килә. Ауыл тарихын да, арҙаҡлы шәхестәр тураһында ла, ауылдаштары, күрше-күләндәре, бала саҡ хәтирәләре тураһында бәйән иткән төрлө йөкмәткеле хаттарҙы, мәҡәләрҙе алып ҡыуанабыҙ. Күгәрсен ауылынан Зөлфиә апай Хәйбуллина, Дөмбәйҙән Гүзәлиә Ҡотлогилдина, Мораҡ ауылынан Вәлиулла Нурмөхәмәтовтарҙың хәбәр-хаттарын, моғайын да, "Мораҙым"дың тоғро дуҫтары ла көтөп алалыр.  Вәлиулла ағайҙың "Беҙҙең Зәйнәп апай" тигән мәҡәләһе иһә гәзитебеҙҙең киләһе һандарының береһендә донъя күрәсәк.  Беренсе уҡытыусыһына булған ихтирамы, һөйөүе ошо мәҡәләлә тәрән сағыла. "Миңә тормош юлын үткәндә төрлө уҡытыусыларҙы күрергә тура килде. Әммә Зәйнәп апай кеүек сибәр, мөләйем, кешелекле, кеселекле, бөтә ауыл халҡы ихтирам иткән уҡытыусылар булмағандыр ул: бөхтә, ыҫпай итеп кейенгән, сәстәренең һәр бөртөгө матур итеп таралған, күҙ ҡараштары яғымлы, йылы нур бөркә. Класҡа килеп инһә, бүлмә яҡтырып киткәндәй була. Эш өҫтәле артына баҫҡас та, йылы ғына өндәшеп, йомшаҡ ҡына иҫәнләшә, ошо мәлдә күренеп ҡалған ап-аҡ, тигеҙ тештәре уға тағы ла матурлыҡ өҫтәгәндәй тойола..." тип уртаҡлаша ул хәтирәләре менән.  1958 йылдар Түкәт мәктәбендә уҡытҡан данлыҡлы нәҫел ҡыҙы мөғәллимә Зәйнәп Аҡбирҙина тураһында мәҡәлә һеҙҙең дә күңелегеҙгә хуш килер тип ышанабыҙ.