Туған телебеҙҙең наҙын тойоп

 Башҡорт телен туған тел һәм дәүләт теле булараҡ уҡытыуҙан тыш, ул 2007 йылдан бирле мәктәптә тәрбиәүи эштәр буйынса директор урынбаҫары вазифаһын намыҫ менән башҡара. Даими үҙ өҫтөндә эшләп, даирәһен киңәйтеүгә, заман менән бергә атларға ынтылған ижади ҡарашлы уҡытыусы ғына түгел, өлгөлө әсә лә, уңған хужабикә лә, әүҙем йәмәғәтсе лә. 31 йыл тормош юлын бергә-бергә татыу үткән икенсе яртыһы Фәнил Әхмәт улы өсөн Эльвира Юлай ҡыҙы – тоғро һәм ышаныслы ҡатын. Икеһе лә мәғариф өлкәһендә, бер мәктәптә эшләгәнгә һәм хеҙмәт юлында бер-береһенә ныҡлы таяныс була белгәнгә күрә лә, эштәре лә ырамлы, тормоштары ла нурлы, ғаилә күге лә яҡты уларҙың.

 Әйткәндәй, эш тип янған изге һөнәр эйәһе Аҡмулланың тыуған көнөнә, йәғни бөгөнгә тиклем, мәктәптә башҡорт теле аҙналығын уҙғарып, һәр дәресте, сараны балалар өсөн оло байрам, асыштарға бай әхлаҡи-рухи тәрбиә биреү сығанағына әйләндерҙе. Балдай татлы башҡорт теле аша бала күңеленә һалынған изгелек орлоғо, иман, аҡыл, әҙәп төшөнсәләре, һис шикһеҙ, уҡыусыларға киләсәктә тоғро юлдаш, яҡты маяҡ булыр!