Уҡыусыларҙың бер өлөшө дистанцион уҡыуға күсерелә

Башҡортостанда 12 райондың ҡайһы бер мәктәптәрендә дистанцион уҡытыу ойошторола. Республика Мәғариф министрлығының матбуғат хеҙмәте хәбәр итеүенсә, 22-23 сентябрҙән Әбйәлил, Балтас, Бәләбәй, Белорет, Бишбүләк, Бүздәк, Бөрйән, Ғафури, Шишмә, Мишкә, Стәрлебаш, Яңауыл райондарының 5-се, 6-сы, 7-се, 8-се, 10-сы класс уҡыусылары 14 көнгә дистанцион уҡыуға күсерелә.

«Әлеге сара балаларҙың респиратор инфекциялары, шул иҫәптән һанап үтелгән райондарҙа яңы коронавирус инфекцияһы менән ауырыу күрһәткестәренең юғары булыуына бәйле ҡабул ителде, — тип белдерҙеләр ведомствола. — Һәр мәктәптә санитар-эпидемиологик хәлде иҫәпкә алып, коронавирус инфекцияһының таралыуын иҫкәртеүгә йүнәлтелгән сараларҙы ойоштороу буйынса муниципаль оператив штаб ҡарар ҡабул итергә тейеш».

Балаларҙың льготалы категорияһына дистанцион уҡыу осоронда аҙыҡ-түлек йыйылмаһын таратыу ойошторола, тип хәбәр иттеләр Башҡортостан Республикаһының Мәғариф министрлығынан.