Әйтерһең дә пар аттарҙа үтте, Ҡыңғыраулы мәктәп йылдары...

Фән үрҙәрен яулауға бирелгән 11 йыл ғүмер һиҙелмәй ҙә үтеп киткән. Үҫеп буй еткән, етдиләнгән егет-ҡыҙҙарҙы тормош елдәре бик тиҙҙән төрлө тарафтарға таратасаҡ. Әле уларҙы Берҙәм дәүләт имтихандары көтә, ҡабул итеү һынауҙарын да үтәһе бар. Иң мөһиме, уҡыусылар алдында һөнәр һайлау бурысы тора. Мораҡ башҡорт гимназияһы быйыл 53 уҡыусыһын оло тормош юлына сығара. Улар араһында мәктәп данын, район бәҫен арттырып олимпиадаларҙа, төрлө конкурс һәм ярыштарҙа ҡатнашып еңеү яулаған уҡыусылар ҙа бихисап. 11-се “в” класы уҡыусыһы Аделина Мырҙабулатова хаҡында гимназистар ҙа, уҡытыусылар ҙа ҙур ғорурлыҡ менән һөйләй.Тырыш ҡыҙ 1-се кластан алып гел “5” билдәләренә өлгәшкән, “Уҡыуҙағы айырым уңыштары өсөн” миҙалына дәғүә итә. Уҡыу дәүерендә уға биология һәм экология фәндәре айырыуса еңел бирелә, был фәндәрҙән район олимпидаларында еңеү яулап, Аделина республика сараларында ла көс һынай һәм призер була. Уҡыуҙағы юғары уңыштары өсөн 2019-2020 уҡыу йылында А.Мырҙабулатова район хакимиәте башлығы стипендиаһына лайыҡ була.