"Ҡояшлы шәрбәт" эшләү серҙәре

         Әйҙәгеҙ, шифалы эсемлекте үҙебеҙ эшләргә өйрәнәйек.
Бының өсөн быяла һауыт - 3, 5, 15 литрлыҡ банкалар, шәкәр, йәнең теләгән файҙалы үләндәр. Бөтнөк (мята), ҡарағат, ҡурай еләге, һырғанаҡ (обліпиха), ҡаҙ үләне, еркәүек, хатта керән япрағында өҫтәргә була. Әлеге ваҡытта айыу емешен дә өҫтәп ебәрәм. Ә былай уны кесерткәндән эшләйҙәр. Мин ҡарағат япрағы ла ҡушып ебәрәм.  Банкаға һалҡын, баллы һыуҙы ҡойоп, ауыҙын марля менән ҡаплап, тәҙрә төбөнә ҡуябыҙ. Шишмә һыуы булһа, тағыла яҡшыраҡ.
         Был эсемлек дөрөҫ килеп сыҡһын өсөн  банкалар ҡояшта торорға тейеш. Исеме лә «сурица» -  славян телендә ҡояш һүҙенән алынған. Эсемлек дүрт көндә әҙер була. Ә ныҡ ҡояшлы көндә ике көндә лә ферментация ваҡыты етә. Бызырлап торған эсемлекте һөҙөп һыуытҡысҡа ҡуябыҙ. Әлбиттә, бал менән шифаһы күберәк. 3 литрлы банкаға 150 г  бал иҫәбенән һалабыҙ. Ә кемдең диабет - улар шәкәр һалмай, туҡранбаш, еркәүек, төрлө емештәр һалып эшләй ала.
Эшләй торғас, ғәилә ағзаларының үҙҙәренә генә оҡшаған үләндәре асыҡлана ул. Шуға төрләндереп ҡарағыҙ.
Иҫкәрмә: ағыулы үләндәрҙе һалыуҙан һаҡланығыҙ.
Шулай уҡ  эш барышында  бысаҡ, тимер ҡалаҡ ҡулланырға ярамай. Әгәр эсемлектән тәмһеҙ еҫ сыҡһа, үләне серей башлаһа, эсергә ярамай.

Аҫылбикә Мәжитова.