"Күңелле ваҡыттар иҫкә төштө..."

Юлдыбай ауыл мәҙәниәт йортонда 2435-се һайлау участкаһы урынлашҡан.  Комиссия рәйесе Азамат Алламоратов та, уның урынбаҫары Резеда Айытҡужина ла, комиссияның башҡа ағзалары ла урындағы халыҡты яҡшы белә. Беҙҙекеләр һайлауға килмәй ҡалғаны юҡ, йыл да әүҙемлек күрһәтәләр, ти улар.

• Һайлау беҙҙең өсөн үҙе ҙур ваҡиға, - ти Төпсән ауылынан килгән Рәмзиә апай Миңлебаева.

Рәмзиә апай сирек быуат “Искра” совхозында һауынсы булып эшләгән. Уның тормош иптәше Муса Хәйбулла улы ла намыҫлы хеҙмәт юлы үткән, ул өҫтә атап киткән хужалыҡта шофер, инженер булып тир түккән. Миңлебаевтар хәҙер инде хаҡлы ялда. Күркәм пар 4 бала үҫтергән, 13 ейән-ейәнсәре бар. Хаҡлы ялдабыҙ, тип ҡул ҡаушырып ятмайҙар улар,  бөгөнгө көндә өй һалалар, бына тигән хужалыҡтары бар.

• Элек тә һайлауҙар күңелле үтә торғайны. Мин үҙем Нуҡай ҡыҙымын, һайлау ваҡытында Түкәттән туғандар ҡунаҡҡа килә торғайны. Шул күңелле ваҡыттар иҫкә төшөп китте бөгөн, - ти Рәмзиә апай.